金希澈孖女神邱淑貞 睇完蠟像館再遊迪士尼

aikowu

韓國男團Super Junior前晚先喺澳門開完演唱會，原本以為佢哋會返回韓國準備工作，估唔到成員金希澈竟然撇甩隊友，仲嚟咗香港密會佢個女神邱淑貞呢。

其實希澈都話視邱淑貞做女神，之前佢哋仲喺內地節目《一路上有你》見面，當時邱淑貞仲提早為7月牛一嘅希澈慶祝生日，搞到希澈好鬼開心，唔知係唔係咁兩人成為好友，前晚SJ開騷，希澈仲收到邱淑貞送上嘅花籃，真係開心死希澈呢位小粉絲。

不過希澈嘅開心事真係未停過，今日佢又喺Instagram晒相，原來佢趁開完騷後就撲到香港嚟同女神見面，希澈先上載佢遊覽山頂蠟像館嘅照片上網，當中佢見到張國榮、姚明同甄子丹嘅蠟像時，就化身做自由行大擺甫士影合照，認真鬼馬。之後佢就再上載同戴住口罩嘅邱淑貞合照，認真開心爆燈。

另外，亦有網民發現希澈孖住邱淑貞同遊迪士尼，不過現場所見就未見邱淑貞嘅寶貝女喺身邊，唔知係唔係怕喺迪士尼遇到希澈嘅粉絲，一陣太熱情逼親小朋友就唔好啦。

死神只峰

玩得很盡興啊