迫人「奶」腳趾…應采兒扮無辜 賴兄弟團孤寒

alancari

梁烈唯今晚與去年1月已成婚嘅女友Tina(駱保雯)今晚喺洲際酒店補擺喜酒，筵開52席。雖然係補擺酒，但接新娘等儀式一樣做到足，亦有姊妹團收取開門利是，約五位數，唯唯更抵死地謂:「六位數就太多喇。」但就爆料指姊妹團之一嘅陳太——丁丁應采兒好狼死，今早嫌開門利是太少，即場「打劫」兄弟袁偉豪銀包，拿了千幾蚊；唯唯又好擔心今晚婚宴上被灌醉，佢講嗰陣，望望身邊影緊相嘅丁丁，話:「雖然我班兄弟好飲得，但班姊妹仲飲得!」難怪唯唯嗌驚驚!

輪到丁丁做訪問喇，佢話:「邊個唔驚我？」又馬上裝出無辜樣:「咁開門利是係唔夠呀嘛，邊個叫佢哋唔帶多啲錢？」但班兄弟話自己連的士錢都冇喎，丁丁話:「呢個唔係我問題喎。做咩唔帶多啲錢出街？咁鬼孤寒。」

丁丁話自己今日一早起身湊B，擔心唔夠精神撐到今晚。「我會盡力0架喇，平時都係Tina睇住我，但今晚冇人睇囉。」佢又話今晚應該再冇遊戲玩一對新人……應該係咋，因為丁丁話睇mood喎，睇下到時心情點啦。

至於滿唔滿意今朝班兄弟團嘅表演？丁丁話:「簡單咗啲囉，佢哋全部都係藝人，唱歌跳舞冇難度。」對於唯唯投訴話有姊妹玩遊戲時「賴貓」，丁丁話:「係咩，我唔知喎，乜呢個世界有公平嘅咩？」又大爆唯唯曾經同佢講，話好鍾意Tina啲腳趾，覺得好得意，所以丁丁先至諗咗呢個估腳趾遊戲:「本身諗住輸咗嗰個要『奶』晒所有腳趾，不過最終冇咁做到囉。」

死神只峰

梁烈唯終於結婚了啊

羅馬王子

她身材很不錯