首尔零食特集！必试16款精选零食！

babymaroon

其实依家去韩国扫零食，究竟仲有几多人会买Brownie、鱼仔饼呢？或者买手信畀公司同事都仲会嘅，但自己食就真系唔．想．啰！皆因韩国永远讲潮流斗In，我哋呢班紧贴潮流嘅香港猪猪当然要时刻跟上步伐啦！

话说早排小妹同朋友又去韩国，讲真首尔呢个地方真系去极唔厌，唔讲化妆品、护肤品，斋讲美食就已经值得一去再去。小妹今次有个特别企划，就系扫尽韩国特色零食，纯粹分享，大家睇完就算，因为到各位去到可能已经冇咗或者Out咗，如果阁下唔听话都可以去揾吓嘅… …但我唔担保实有啰，利申！


（１）Samlip士多啤梨夹心三层蛋糕

小妹认为呢个蛋糕真系士多啤梨系列入面最好食嘅，两片海绵夹住士多啤梨忌廉，香滑软熟，好食过香港大牌「嘉Ｘ雪芳蛋糕」，啲忌廉极幼滑之余又充满士多啤梨嘅香甜，Yummy Yummy！各大便利店都有得卖，但最好早餐时间去，因为过咗就会畀啲学生哥抢晒！





（２）Samlip士多啤梨曲奇

话就话系曲奇，其实系似老婆饼嘅质感，入面包住杰身嘅士多啤梨冬瓜蓉，味道香口，但要有心理准备较干身，斋食唔饮嘢会好难吞。





（３） Biggrae士多啤梨奶

简直系港女至爱，粉红色嘅牛奶梦幻甜蜜，仲系港女最爱嘅士多啤梨味，便利店同超级市场长期有货，唔使惊！




（４）极大盒士多啤梨（购自乐天超市）

系人都知韩国盛产士多啤梨，如果去超级市场买手信，千祈唔好错过蔬果部，因为嗰度经常推出特价时令生果，大大盒士多啤梨都系W6320，即系港纸$50到，而且粒粒清甜，香港$50得十零粒，呢盒起码40粒起跳，小妹同朋友食咗几晚先食得晒！





（５）乐天士多啤梨忌廉Bun

呢个士多啤梨忌廉Bun都好值得推介，好味程度仅次于士多啤梨夹心三层蛋糕，一边忌廉由士多啤梨果肉打成，一边则系轻盈牛奶忌廉，双重享受但一啲都唔漏，比起香港个大牌子得啲好Full嘅忌廉相比，呢个Fresh好多。





（６）Petitzel Sweety士多啤梨忌廉卷蛋（士多啤梨／朱古力）

呢个蛋卷虽然Full of Strawberry Cream，但一啲都唔Full，因为都系用新鲜士多啤梨一齐打成Cream，酸酸甜甜咁，个人觉得朱古力味冇咁单调，朱古力微苦可以中和甜味。





（７）士多啤梨粒粒果三文治

呢个三文治一推出，吸引劲多韩妹、Blogger放上IG呃Like，引到一班港女哗哗声！小妹喺韩国行咗劲多间便利店先揾到，而且唔系日日有同间间有，终于畀我喺一间冇乜人行、位于东大门设计广场地下嘅便利店揾到！所以大家如果想食，可以摷摷啲非旅游区、非大学区、零人经过区嘅便利店，可能都仲有啲机会！讲番味道，个人觉得冇同牌子嘅芒果蓝莓酱三文治咁好食，皆因佢士多啤梨肉少又冇乜味，忌廉又较多，所以都系攞嚟呃Like会好啲，期望唔使太大。




（８）芒果蓝莓酱三文治

呢个就系上面讲嘅好味三文治，佢嘅卖点系极厚超甜芒果肉同新鲜自家制蓝莓果酱，本身以为会系个伏，但食落香甜又好味，芒果肉包甜，而蓝莓酱又食到打碎咗嘅果肉，真材实料过士多啤梨三文治！





（９）Cafe Snow士多啤梨果粒卷蛋

由士多啤梨海绵蛋糕制成，同上面介绍嘅卷蛋唔同嘅地方，忌廉系纯牛奶忌廉，中间仲有粒士多啤梨果肉，雪冻食忌廉会似奶冻，超邪恶但好味！




（１０）桃味汽泡酒

由韩国人气歌手IU代言，品牌「真露」推出，粉红色嘅罐简直系港女杀手，睇落似汽水，实际上饮落都似汽水，甜甜哋又充满桃香，劲易入口，虽然有3%酒精，但唔饮得嘅猪猪都饮到，小妹当汽水咁饮，唔使怕！





（１１）Tiffany Blue汽酒


呢只汽酒唔记得系咪同桃味汽泡酒一样系同一个牌子，但都大受韩国女仔欢迎，皆因又系以汽水Feel做招徕，同样3%酒精，柠檬味清爽冰凉，劲Fresh！佢仲有士多啤梨味，又系女仔失心疯时间。





（１２）Petitzel Sweety布甸

Petitzel Sweety出嘅布甸可以话系韩国人气零食，听韩国朋友讲，未试过呢只布甸，同冇嚟过韩国一样，皆因韩国人人都食佢，而且味道选择多，又香甜幼滑，受欢迎就一定架啦！话说小妹每次去都要买嚟食，尤其系焦糖味，一定系必食之选！




小妹将佢口味嘅好食程度排列如下（个人口味不同，只作参考）：

No.1焦糖味—-个人觉得佢嘅鸡蛋布甸软滑得嚟又有啲弹性，加埋焦糖糖浆一齐食，所有配置啱啱好，糖浆唔会过苦，又唔会太甜腻。由于长期热卖，便利店成日卖断市，去超市会较易买到。


No.2蓝莓芝士味—-食落超似食紧蓝莓芝士饼呀！


No.3紫薯味—-超香浓紫薯味，布甸同样富有弹性。


No.4朱古力味—-质感偏向软身流心，超似慕丝，有香浓朱古力味。


No.5南瓜味—-南瓜味甜品好难难食，但个人觉得呢只味有啲假，不试为妙。





（１３）Jagabee

韩国限定嘅紫薯味（左下）同蜜糖牛油味（右下）最正，紫薯味仲要系用真．紫薯制成，诚意满分！盐味就正常，好似香港都有得买。





（１４）柿干（购自乐天超市）

韩国人钟意食柿，如果想长期食到就一定要买制成干嘅柿，呢个柿干完全天然风干至50%，仍保留柿嘅鲜嫩肉质，食落香甜，表面冇白色糖粒结晶，证明甜味纯天然。小妹妈咪超级钟意食，由于只系买咗一盒，佢有啲未够喉，下次买多几盒先！不过价钱大概$70到，有啲贵，但坚．好食！





（１５）乐天果汁软糖

因为出咗只番茄味所以引起关注，酸酸甜甜劲开胃，仲有士多啤梨、蓝莓、提子同橙味，细细包，放喺Office或手袋超方便。





（１６）乐天向日葵瓜子朱古力

哗！呢个超好食，牛奶朱古力包住向日葵瓜子，你以为风马牛不相及嘅两样嘢，实际系Perfect Match，而且仲会食上瘾，每次几粒几粒放入口，好快又KO一包，所以一定要大量入货，小妹扫十包都算系小儿科喇！








http://blog.ulifestyle.com.hk/bl ... %E9%A3%9F%EF%BC%81/