 容祖兒一連15場紅館個唱——「1314跨年演唱會」15場終於圓滿結束。流盡汗與淚，更因為氣管炎及感冒致聲沙復失聲；除夕倒數完更入了醫院，出來時帶著大包小包一盒二盒藥，翌日再頂硬上現身商台叱咤頒獎禮以示尊重。鋼鐵一樣的意志，累壞了身體，靈魂並未磨蝕。公司同事上下戰友至親密友同最最最最重要嘅係——fans一齊陪同在側為其打氣，當然少不得晚晚在後台「發功」又密集式喺微博出po力撐女友嘅師兄劉浩龍。 今晚尾場開騷時，祖兒仍有點聲沙，高音位唱不到，佢自己都話:「今場大家未必聽到我嘅嘹亮聲音，但大家都未必聽過我Rock show，今晚會用盡200分去唱，唔會令大家失望!」Show must go on，祖兒亦未有令大家失望，越唱越好，最後11點58完場，但都要罰錢。 今晚祖兒甫現身慶功，即猛話好想食雞煲:「我自從冇食肉之後，性情大變呀!我好為食，之前都係食白粥白飯咋。」祖兒又表示自己狀態最差係前晚(即尾二嗰場)。醫生教佢食蕉，結果尾場之前佢就「啪」咗五隻，果然有效。醫生又囑佢唔可以飲凍嘢，驚會令聲帶出血，祖兒話:「我自己都驚，之前體力透支，唔舒服，係靠意志力頂住。我自己噚晚(即前晚)落台之後都有喊，因為做得唔好。」 話雖如此，但祖兒表明一直冇諗過cut場，因為唔想令歌迷失望，二來唔知幾時可以開番。 問祖兒師兄劉浩龍今晚有冇嚟？佢話:「有，佢只係有一晚冇嚟。」估計應是除夕當晚，師兄都要開工。咁啱尾場有隻巨型Miffy出場，Miffy是祖兒至愛，咁係咪師兄扮嘅呢？祖兒話唔係喎，但嗰刻都令佢諗起倪震於周慧敏個唱上扮周慧豹冧女友一幕。 此外，祖兒今晚更有感而發，勇敢地向師兄發表愛的宣言……仲係喺Mani面前。祖兒話:「我想幫佢(師兄)澄清，佢好低調，用最大力量支持我，佢對我好重要，俾好多正能量我，好似一個太陽在身邊，講好多鼓舞說話俾我。我一直以為自己好正能量，但西藥令我好灰。不過其實唔止佢，身邊好多朋友都令我好暖。」 咁係咪對師兄加分？祖兒話:「係患難見真情，靠得住。」又謂:「其實唔止佢，好多中學同學都嚟酒店陪我瞓。」咦，呢句嘢有啲古怪喎，係咪唔小心爆咗師兄都有嚟酒店咩呢…… 再問祖兒下一步係咪生B？佢就話冇計劃。咁不如下次開騷前有個B啦，祖兒就話:「我啱啱生完B(指開個唱)，俾我調理身體先，但我有計劃係喺36歲前生B。」記者指仲有兩年，祖兒即望望Mani，再同記者講:「唔好嚇佢啦!」
|
本周最热文章
944
0