佳礼资讯网

 找回密码
 注册

ADVERTISEMENT

查看: 1330|回复: 1

6月地區座青年部專題: 災難的啟示

[复制链接]
发表于 11-6-2008 03:29 PM | 显示全部楼层 |阅读模式

主題:災難的啟示

男主持:晚安!唔知大家近排有無聽過關於天災同埋北京奧運嘅「驚天大秘密」呢?

女主持:「驚天大秘密」?話明係秘密,又會咁容易知嘅?我唔多清楚喎,不如你講嚟聽下呀?

男主持:好呀,你記唔記得之前喺中國多個城市嘅雪災係幾多號發生呀?

女主持:係咪1月25日呀?

男主持:冇錯。咁之後嘅西藏騷亂呢?

女主持:3月14日?

男主持:咁四川八級大地震又係幾多號呀?

女主持:呢個一定記得喇,5月12日吖嘛。你提咁多日子做咩呀?幾單大事件同今屆奧運又有咩關係先?

男主持:梗係有關係啦!大家有無發現嗰三個日子嘅數字加埋都係8呀?第一個係1月25日:1 + 2 + 5 = 8;第二個係3月14日:3 + 1 + 4 = 8;第二個係5月12日:5 + 1 + 2 = 8。至於今年北京奧運,由8月8日開始舉行,又係8字喎。仲有呀,四川地震第一日距離奧運開幕係88日,真係好邪呀!所以呢,近嚟有流傳話,因為有北京奧運,中國今年先有咁多天災人禍架咋!

女主持:嘩,講到似層層咁嘅。不過真係零零舍舍係今年先咁多災難,但係會唔會係咁啱得咁橋架咋?

男主持:又唔見咁橋有咁好事接二連三咁發生?講開又講吖,我仲聽過一個驚天動地嘅傳聞關於奧運福娃架!

女主持:奧運褔娃?我淨係知道佢地叫貝貝、晶晶、歡歡、迎迎、妮妮。(國語)「北京歡迎你」吖嘛。佢地除咗個樣似軍曹之外,仲同天災有關係咩?

男主持:梗係有關喇!網上面有人話呢五隻嘢係不祥預兆:妮妮嘅頭上係風箏,代表濰坊,於是山東嘅火車就出軌喇。迎迎係藏羚羊,於是西藏就發生騷亂啦。歡歡代表聖火火炬,火炬嘅傳遞就因地震而暫停。而晶晶係一隻熊貓,於是熊貓嘅生長地四川就有大地震喇!家陣淨番貝貝未出事喳!貝貝係一條魚,代表海邊嘅城市,有人話會係香港有難呀,又有個講法話會喺中國出現水災。死啦!點算呀,我哋會唔會劫數難逃呢?
女主持:嘩!咁樣將啲事拉埋嚟講,真係好邪喎……嚇死人咩?我住喺八樓,屋企望到對面海,咁咪好危險?

男主持:真係越講越驚呀!大家話係咪呀?(問問邊個會友驚,邊個唔驚)


女主持:其實……邊驚得咁多呀。我地作為創價學會嘅會員,日蓮大聖人嘅弟子,面對社會呢啲咁負面、咁迷信嘅謠言,應該要展現正確嘅信心姿勢!

男主持:冇錯呀,我地信受日蓮大聖人嘅佛法,係合乎常理嘅生活法。佛法教導我哋喺日常生活中通過信、行、學嘅實踐,發揮智慧同埋生命力,踏實咁創造所願滿足嘅人生。既然係講求合理、強調務實,試問又點可以東拉西扯咁去解釋社會問題呢?

女主持:係囉,佛教強調因果,亦教人積極咁面對苦難。竟然災難已經發生咗,我地應該好好咁反省,究竟呢啲天災嘅成因同傷害,有幾多係人為因素呢?例如一直以嚟,人類究竟點樣對待自然環境呢?地球真係病咗喇,異常嘅天氣、四處嘅天災,正正係地球俾我哋警號。有人慨嘆「天災無情」,甚至怨個天「玩嘢」,但其實大家撫心自問,喺追求經濟富裕、生活改善嘅同時,點樣可以減少污染同浪費呢?點樣先可以向住一個可持續發展嘅未來,好好咁愛惜一切呢?

男主持:另一方面,雖然天災令人覺得自己好渺小、好無助。但事實上有啲情況係可以避免或者減低傷亡嘅。好似嗰啲豆腐渣工程,就係因為建築過程偷工減料,令到建築物唔堅固,十秒鐘之內垮成一堆碎石,表面上係天災,其實係人禍。又例如之前嘅緬甸風災,由於軍政府拒絕外國救援人員入境,大大拖慢救援工作,令到傷亡數字未能控制。以上嘅問題其實係可以改善嘅。

女主持:所以話,執政者同民眾嘅智慧、慈悲,仲有正確嘅價值觀,真係好緊要架。

男主持:吖,唔知大家有冇學過日蓮大聖人嘅〈立正安國論〉呢?

女主持:相信大部分會友都聽過,不如重溫少少同今次專題相關嘅重點啦!

男主持:好呀!大聖人在世當時嘅日本,天災、戰亂等三災七難紛然競起,包括有鎌倉發生嘅大地震、寒氣、大洪水等等異常嘅變化、仲有飢荒、傳染同埋後來嘅戰爭,令民眾陷於水深火熱之中。大聖人就係為挽救當時嘅民眾脫離苦難而著作〈立正安國論〉嘅。

女主持:所謂「立正」就係以正法為信仰嘅根本。「安國」即係繁榮社會,實現和平,令人們嘅生活安穩。「國」係指國家,包括國土以及全世界嘅環境。

男主持:宏觀嚟睇,〈立正安國論〉指出造成災難嘅原因,就係社會上嘅主流思想、核心價值嘅混亂,民眾堅守嘅信念背離咗正法。呢度所帶出嘅積極意義,就係鼓勵各位要自覺起廣宣流布嘅使命。

女主持:我們身處嘅世界面臨住核武嘅威脅,嚴重嘅貧富懸殊、環境污染、氣象異常等等大問題,雖然同大聖人在世嘅情形唔同,但都不離三災七難競起,五濁惡世嘅實情。所以,呢一刻就需要作為弟子嘅我哋以廣宣流布去實現立正安國。

男主持:冇錯呀,大家都知道池田先生幾十年嚟一直同國家領導人,以及世界各地嘅有識之士進行和平對話,由周恩來嘅年代直到今日胡溫嘅年代,中國領導都對學會抱持正面嘅評價,Sensei一人立起咁為中日友好打下基礎。

女主持:雖然就中國現時嘅國情嚟講,我哋暫時未可以去弘教,但係中國逐步踏入國際舞台,不斷咁改革開放,相信喺我哋或者下一代嘅有生之年,就可以開展中國廣宣流布,令數以億計嘅人民接觸到呢個幸福宗教,香港會友當然係先頭部隊啦!

男主持:係呀!面對住種種大難,法華經行者絕對唔會置身事外,更加唔會退縮或者危言聳聽;而係會以積極行動,關懷社會,有錢出錢,有力出力,例如為苦難嘅人送上題目,並且確立起廣宣流布嘅使命。


女主持:最後希望同大家共勉,中國未來嘅廣宣流布,靠我哋架喇!行師匠未行完嘅路,呢啲就係師弟精神喇。大家要好好咁裝備自己,到呢一日出現嘅時候,大家都要充滿信心咁講一句:“We are ready!”

男主持:今日同大家分享到呢度,以上。

http://givemefivefivefive.blogspot.com/

[ 本帖最后由 dogdog369 于 11-6-2008 03:30 PM 编辑 ]
回复

使用道具 举报


ADVERTISEMENT

发表于 11-6-2008 10:59 PM | 显示全部楼层
........面對社會呢啲咁負面、咁迷信嘅謠言,應該要展現正確嘅信心姿勢!

BINGO!
回复

使用道具 举报

您需要登录后才可以回帖 登录 | 注册

本版积分规则

 

所属分类: 宗教信仰


ADVERTISEMENT



ADVERTISEMENT



ADVERTISEMENT

ADVERTISEMENT


版权所有 © 1996-2023 Cari Internet Sdn Bhd (483575-W)|IPSERVERONE 提供云主机|广告刊登|关于我们|私隐权|免控|投诉|联络|脸书|佳礼资讯网

GMT+8, 29-3-2024 03:24 AM , Processed in 0.052358 second(s), 24 queries , Gzip On.

Powered by Discuz! X3.4

Copyright © 2001-2021, Tencent Cloud.

快速回复 返回顶部 返回列表